Така туякты, туяк тулпарды, тулпар эрди, эр жеңишти сактайт. Такасы жок ат менен кыл чайнашкан беттешке чыкмак тургай, жөн гана минип жүрүү да канча коопту эмеспи?.. Кыргыздар бээге гана така какпайт эле го. Бирок Казакстанда көкпар боюнча дүйнө чемпионатын уюуштуруп жатканда такасы жок ат менен улак тартуу жылаңайлак футбол ойногон сыяктуу экенин эске алышкан эмес окшойт. Муну уккан кыргызстандыктар улакчыларын жоого тарттырып ийгендей чуу түшүп калышты. Албетте, мурда элин чаап кетип күчтүүлүгүн көрсөтсө, азыр баатырдык спорттук мелдештер менен бааланып калбадыбы…
Дүйнөлүк чемпионаттын программасы боюнча кыргыз улакчылары Монголия менен беттешүүгө эртең менен чыкмак. Бирок така чыры кыргыз улакчыларын бир топ кыжалаат кылды.
Ал арада аттын такасын чечүүгө макул болбогон кыргыз улакчыларын ойнотпой туруп эле атаандаштарына жеңилди деп эсептеп коюшту. Мындан улам нааразычылыктар дагы ырбап, сүйлөшүү жүргүзүү үчүн ортого элчилер аралашты.
Таарынган биз эле эмес. Ошол эле учурда Түркиянын командасы АКШны жеңип алса, араңарда Кыргызстандын жарандары жокпу деп паспортторун бирден текшерип чыгыптыр. Буга арданган түрк улакчылары оюндан баш тартабыз деп чыгышты.
Соңку чечим чыкты. Акырында боордошторубузду таарынтып албайлы дештиби, така менен чыгууга, ошол эле учурда убагында болбой калган беттеш да кайра өтө турган болду.
Ошентип күн бою чыр жараткан мелдеш кечкэ жуук өтүп кыргыз улакчылары алгачкы жеңишти камсыздады. Ал кандай өткөнүн бул жерден кенен көрө аласыздар.
Ал эми көк бөрү оюну качан пайда болгону жана кимдер ойногону туурасында бул жерден таанышыңыз.
Бүгүн өлкө аймагында күн ачык болот.
Валюта наркы. Сомдун баасы долларга карата орто эсеп менен 68.56 (сатып алуу) жана 68.83 (сатуу) сомду түздү.
Мунай баасы. Бишкекте орточо эсеп менен алганда АИ-92 үлгүсүндөгүсү 37.70 сом, АИ-95 үлгүсүндөгүсү 40.50 сом, ал эми дизель майы 35.50 сомдон сатылууда.
Соңку сөз. Аттын аттан неси артык ашыра баскан изи артык.
Элибиздин ынтымыгын тилеп Эламан Карымшаков.
