25-июлда көк бөрү боюнча улуттук курама команданын капитаны Талас Бегалиев менен федерациянын вице-президенти Жыргалбек Саматов Астанага чучу кулак кармоо үчүн барышкан. Ал жактан желимден жасалган муляжды көрүшкөн. Жасалма улак Казакстанда өтө турган көк бөрү боюнча эл аралык чемпионатта колдонулат.
Видеодон 45 миң сомго алынган муляждын жыртылып калганын көрүүгө болот.
"Бул муляж менен чемпионатты өткөрүү мүмкүн эмес. Машыгуу учурунда 5-10 мүнөт ичинде айрылып калды. Муну менен Казакстанда кантип ойношкон түшүнүксүз. Эми казакстандык өндүрүшчүлөр менен байланышып товарды алмаштырып берүүлөрүн суранабыз", — деп билдиришти федерациядан.
Беттеш Казакстандын борборунда 20-28-август аралыгында болот. Ага 12 мамлекеттен келген командалар катышат. Чучу кулак кармоодо "А" тобуна Кыргызстан, Түркия, АКШ, Өзбекстан, Монголия жана Тажикстан кирген. Ал эми "В" тобунда Казакстан, Азербайжан, Россия, Венгрия, Кытай жана Афганистан бар. Өз тобунда жеңип чыккан команда финалга чыгат.
