БИШКЕК, 14-авг.— Sputnik. Казак-кыргыз чек арасын бузгандарга ок аткан аскерийлерге кылмыш иши козголуп, тергөө иштери башталды. Бул туурасында Sputnik Казахстан алардын Башкы прокуратурасына шилтеме кылып кабарлады.
Көзөмөл органы учурда чек арачыларга карата мыйзамсыз аракеттерге баргандар Кылмыш кодексинин 380-беренесинин (бийлик өкүлдөрүнө карата күч колдонуу) негизинде тергелип жаткандыгын билдирген. Маалыматта ишти Жамбыл районунун ички иштер бөлүмү жүргүзүп жаткандыгы айтылган.
"Ошол эле учурда окуянын катышуучуларына жана ага объективдүү баа берүү үчүн ИИМ тарабынан иликтөө жүргүзүлүп, аскер кызматкерлерине карата куралды колдонгону үчүн Кылмыш Кодексинин 451-беренесинин негизинде тергөө башталды", — деп билдирген маалымат кызматы.
Буга чейин 12-августтин кечинде Кыргызстандан Казакстанга мыйзамсыз өтүүгө аракет кылган адамдарга казак чек арачылары ок чыгарып, бир адам көз жумганы кабарланган. Андан бир аздан соң кыргыз-казак чек арасында ок тийип каза болгон адам Казакстандын жараны экени маалымдалган. Анда Тараз аймагында чек ара кызматын күзөтүү күчөтүлүп, качып кеткен адамдарды издөө жана алардын ким экендигин тактоо иштери жүрүп жаткандыгы айтылган.
