БИШКЕК, 13-авг. — Sputnik. Кыргызстандан Казакстанга мыйзамсыз өтүүгө аракет кылган адамдарга казак чек арачылары ок чыгарып, бир адам көз жумганын Sputnik Казакстан агенттиги өлкөнүн Чек ара кызматына шилтеме берип жазып чыкты.
Маалыматка ылайык, 12-август күнү кыргыз-казак чек арасынан 15ге чукул белгисиз адам оролгон зымдан өтүүгө аракет кылган. Бул учурда аларды "Жасоркен" чек ара заставасынын күзөттө турган чек арачысы байкап калган.
Мыйзам бузгандар казак чек арачыларына баш ийбей каршылык көрсөткөн. Натыйжада күзөтчүлөр түрдүү жаракат алып, ок чыгарууга аргасыз болушкан.
"Чек ара бузуучулардын бири жарадар болгон. Бирок аны жанындагы шериктештери таштабай, өздөрү менен кошо алып качышкан. Кийинчерээк жаракат алган адам каза болгону маалым болду", — деп жазылат маалыматта.
Учурда Тараз аймагында чек ара кызматын күзөтүү күчөтүлүп, качып кеткен адамдарды издөө жана алардын ким экендигин тактоо иштери жүрүп жатат.
