БИШКЕК, 28-июл. — Sputnik. Гүлнара Каримова жардам берди деген кылмыштуу топ Өзбекстанга 1 миллиард 651 миллион 800 миң доллар зыян келтиргенин өлкөнүн башкы прокуратурасы билдирди.
Каримова кармалып, ага Өзбекстандын Кылмыш жаза кодексинин алты беренеси боюнча кылмыш иши козголгон. Ал салык төлөөдөн баш тарткан, акча уурдоого тийиштиги бар, мамлекеттин мүлкүн уурдап, документтерди жок кылган деп айыпталууда.
Прокуратуранын маалыматына ылайык, кылмыштуу топ уурдалган каражаттарды 12 мамлекетте адалдаштырган. Алар:
- Швейцария — 777,8 миллион доллар, Колони шаарында наркы 18,5 миллион франк турган вилла;
- Швеция — 30 миллион доллар
- Улуу Британия — 4,2 миллион фунт, Лондондо жалпы баасы 22,9 миллион фунт турган үй, батирлер;
- Франция — Париждеги батир жана хан сарай, Сан-Тропе шаарындагы вилла. Алардын бардыгы 52,5 миллион еврого бааланат;
- Латвия — 16,5 миллион долларлык акча жана баалуу кагаздар. Риганын борбордук бөлүгүндө баасы 9 миллион евро болгон көңүл ачуу жайы;
- Ирландия — 300 миллион долларга бааланган баалуу кагаздар жана акча;
- Мальта — 48,8 миллион долларлык учак;
- Германия — 2 миллион доллар;
- Испания — 82 миң доллар;
- Россия — 6 миллион доллар, "Камелот" комплексиндеги пентхаус, "Рублевакадагы" үй жана сегиз батир, мейманкана комплекси, Ялтадагы үй менен жер тилкесинин баасы 2 миллион долларды түзөт;
- Гонконг — 67 миллион доллар жана баасы 15 миллион доллар турган пентхаус;
- Бириккен Араб Эмирлиги — 32 миллион доллар, алтын жана жалпы суммасы 31,5 миллион долларды түзгөн алтын сертификат, пентхаус, эки вилла жана Дубайда баасы 67,4 миллион доллар турган эки мейманкана комплекси.
Эл аралык кызматташуунун алкагында аталган мамлекеттин компетенттүү органдарына аты аталган мүлктөрдү камакка алуу боюнча тергөө органдарынын токтому жиберилген.
