Ооруга чалдыккандар азайган менен кургак учуктун туруктуу формасына каршы күрөшүү көйгөйлүү болуп жатат. Бул тууралуу Sputnik Кыргызстан маалымат агенттигине Улуттук фтизиатрия борборунун жетекчиси Абдуллат Кадыров билдирди.
Анын айтымында, кургак учуктун дарыга туруктуу формасын мурда 20 айда дарыласа, азыр анын натыйжалуу жолдору чыга баштады.
"Кургак учуктун сезгич жана дарыларга туруктуу формасы деген эки түрү бар. Оорунун сезгич формасына кабылгандар 6-7 ай бою дарыларын толук ичип, бардык талаптарды аткарса 100 пайыз толук айыгып кете алат. Ал эми дарыга туруктуу формасынын натыйжалуулугу дүйнө жүзүндө 50 пайыз гана болуп жатат", — деди ал.
Анын айтымында, илдетке чалдыккандардын ичинен 100 кишиден 50сү гана айыга алат экен.
"Буга чейин мындай түргө кабылган оорулуулар 5-6 дары ичип 20 ай дарыланчу. Бул убакыттын ичинде оорулуу күчтүү дарыларды ичкенде чыдабай кетет экен. Анан да дарылар башка органдарга терс таасирин тийгизет. Азыр болсо Дүйнөлүк саламаттыкты сактоо уюму 9-12 ай дарылоо планын иштеп чыгып, майнаптуу дарыларды сунуштоодо", — деди Кадыров.
Улуттук фтизиатрия борборунун жетекчиси кургак учук аба аркылуу жуккандыктан адамдарды коомдук жайларда абайлап жүрүүгө, жуктуруп албаш үчүн жакшы тамактанып, иммунитети жогору алып жүрүү зарылдыгын эскертти.
