Эң арзан эт Кыргызстандын кайсы аймагында сатылат? Тамшанткан рейтинг

Улуттук статистика комитети Кыргызстандагы этсиз жашай албагандардын каражатын үнөмдөй турган аймактарды аныктады. Мындан улам Sputnik Кыргызстан агенттиги арзан баада эт саткан шаарлардын рейтингин түзүп чыкты.

Ведомствонун маалыматына ылайык, уйдун этин эң арзан баада Жалал-Абаддын Кербен шаарынан таба аласыз. Ал жакта анын бир киллограммы 260 сомдон сатылат. Экинчи сапта Кара-Балта — 175 сом, үчүнчүдө Оштун Ноокат шаары — 280 сом. Ал эми эң кымбат эт Нарында сатылат. Ал жакта килограммы 326 сомду чамалайт.

Ал эми койдун этин эң арзан баада саткан Каракол шаары болду. Ал жерде килограммын 272 сомдон аласыз. Кийинки орунда Кара-Балта менен Токмок (276 жана 277 сомдон) турат. Баарынан кымбат баа койгон Баткен шаары. Кой этин бул жерден 350 сомдон сатып алууга болот.

Тоок этин арзан баада саткан аймактардын сап башына Токтогул шаары турат. Ал жактан бир килограммын 110 сомго аласыз. Мындан 10 сомго кымбат саткан Токмок шаары экинчи катарда. Ал эми үчүнчү орунду Кара-Балта,Ноокат, Бишкек шаарлары бөлүп калган. Ал жакта орточо баа 121 сомду түзөт. Ал эми килограммын 145 сомдон саткан Исфана эң кымбат шаар деп табылды.

Ышталган колбасаны баарынан арзан саткан Өзгөн менен Кара-Суу: ал жакта килограммы 230 сомдон. Экинчи орунда Исфана — 297 сом. Үчүнчү орунда Балыкчы — 315 сом. Эң кымбат колбаса Токмокто, бир килограммы 400 сомдон сатылат.