БИШКЕК, 3-июл. – Sputnik. АКШнын Кыргызстандагы ыйгарым укуктуу элчиси Шейла Гуолтни мөөнөтүнөн мурда кызматынан кетүү чечимине келгенин элчиликтин расмий сайтына жарыяланды.
Андагы маалыматка караганда, элчи кызматынан кетип жаткандыгын Америка Кошмо Штаттарынын 241 жылдык эгемендүүлүгүн белгилөө аземинде билдирген.
“Бүгүнкү салтанаттуу иш-чарада жеке багыттагы маалыматым менен бөлүшө кетүүнү туура көрдүм. Мамлекетиме 33 жыл кызмат кылдым. Анын көпчүлүк бөлүгү чет мамлекетте өттү. АКШнын атынан Кыргызстанга элчи катары кызмат кылганым үчүн сыймыктанам. Эми мен үйгө кайтууну чечтим. Үй-бүлөгө болгон сүйүү кыргыз жана америка эли үчүн маанилүү нерсе. Ошондуктан менин үйгө кайтып жатканымды туура кабыл аларыңыздарга ишенем. Бир нече жумадан кийин Мен Кыргызстандан кетем”, — деп билдирген Гуолтни.
Белгилей кетсек, Шейла Гуолтни Кыргызстанга АКШнын ыйгарымдуу укуктуу элчиси болуп 2015-жылдын сентябрь айында келген. Ал 1999-2002-жылдары Кыргызстандагы АКШ элчисинин орун басары болуп иштеген.
