БИШКЕК, 27-июн. — Sputnik. Кол өнөрчүлөрдүн жетекчиси Тоюмбүбү Аманованын Sputnik Кыргызстан агенттигине билдиргенине караганда мындай көлөмдүү шырдакты даярдоого эки ай убакыт кеткен.
"Элеттик аялдар өзүбүзчө бирикме түзүп 2000-жалдан бери ала кийиз, шырдак жана кийиз буюмдарын жасап иштеп келе жатабыз. Буга дейре диаметри 9 метрге чейинки шырдактарды жасачубуз. Мындай көлөмдүүсүн биринчи жолу жасадык. Жалпысынан 6 чебер жана жардамчылары менен кошулуп 15 адам эмгектенди", — деди "Чебер колдор" бирикмесинин жетекчиси.
Аманова бул шырдакты жеке ишкер Ысык-Көлдө боз үй формасында курулган конок үйүнүн ичин улуттук стилде жасоо максатында атайын буюртма бергенин билдирди.
Мындай шырдактарга кызыгып чет өлкөлүктөр да сатып алышат экен. "Чебер колдор" коомдук бирикмесинин шырдактарын Кытай, Корея сыяктуу өлкөдөн келген ишкерлер алып кетишкен.
"Шырдактардын бир чарчы метри 4000 сом турат. Чет элдиктерге жана аз санда алгандарга ушундай баа менен сатабыз. Жогорудагы шырдактын көлөмү чоң болгондуктан чарчы метрин 3500 сомдон жасап бердик. Анын көлөмү 75 чарчы метр болуп, баасы 262 500 сомду (болжол менен 3860 доллар) түздү. Эми дагы ошол эле ишкер жакынкы күндөрү диаметри 16 метрдик шырдак жасоого буюртма берем деп жатат", — деди Аманова.
Белгилей кетсек, Нарындын Ат-Башы районунда 28-29 июнда салтка айланып калган кыргыз шырдагынын VII фестивалы өтөт. Иш-чаранын максаты кыргыз элинин кол өнөрчүлүгү боюнча мурастарын, кийиз жасоо өнөрүн сактап калуу, уздарды колдоо, ошону менен бирге аймактын экономикалык абалын жакшыртуу, туристтерди тартуу болуп саналат.
