БИШКЕК, 16-июн. — Sputnik. "Реал Мадриддин" чабуулчусу Криштиану Роналду салык чырынан улам өзүнүн учурда ойноп жаткан футбол клубунан чыгып жана Испаниядан кете турганын португалиялык A Bola журналы жазып чыкты.
Басылманын жазганына караганда, Роналду кетери туурасында "Реалдын" президенти Флорентино Переске айткан. Футболчунун клубдан федерациялар кубогу жана эмгек өргүүсүнөн кийин кете турганы айтылууда.
Роналду "Реал Мадридде" 2009-жылдан бери ойноп келе жатат. Ал англиялык "Манчестер Юнайтедден" Испания клубуна ал кезде асман чапчыган 94 миллион евролук келишим менен өткөн. Чемпиондор лигасында анын катышуусу менен "Реал Мадрид" эки ирет жеңүүчү болгон. Ал эми бир ирет UEFAнын Супер кубогуна ээ болуп жана Исапаниянын чемпиону аталган. Роналду мындан сырткары төрт ирет "Алтын топтун" ээси болгон.
