БИШКЕК, 16-июн. — Sputnik. Чет өлкөдөн кымбат баалуу унааларды алып келүүдө коррупциялык иш-аракеттер аныкталды. Бул тууралуу Экономикалык кылмыштуулукка каршы күрөшүү мамлекеттик кызматынан кабарлашты.
Маалыматка ылайык, ушул жылдын 11-январында ыкчам-иликтөө иштеринин негизинде "Манас" эл аралык аэропортунда автоунаанын мамлекеттик номерин Россияга алып өтүүгө аракет кылган чет элдик А.В аттуу жаран кармалган. Ал Мамлекеттик каттоо кызматы тарабынан берилген номерди өз ыктыяры менен укук коргоо органдарына өткөрүп берген.
Анын негизинде жүргүзүлгөн текшерүү иштеринде 2012-жылы чыккан Lexus LX570 үлгүсүндөгү автоунаасы Россиянын А.А аттуу жаранына Мамлекеттик каттоо кызматынын Транспортторду жана айдоочулук курамды каттоо бөлүмү тарабынан 2017-жылдын 10-январында катталгандыгы аныкталган.
Ошондой эле тергөө маалында Lexus LX570 унаасынын Россиянын каттоосунан чыккандыгы жөнүндөгү документтин негизинде машина А.С аттуу жаранга жазылгандыгы белгилүү болгон. Документти укук коргоо органдары текшере келгенде ал жасалма болуп чыккан.
Андан сырткары, Бажы кызматынын эсептөөсү боюнча шектүүлөр 1 милион 386 миң 302 сомдук бажы төлөмүн мамлекеттик бюджетке төлөгөн эмес.
Аталган окуя боюнча Экономикалык кылмыштуулукка каршы күрөшүү мамлекеттик кызматы эки жаранга жана Мамлекеттик каттоо кызматынын жумушчуларына карата Кылмыш жаза кодексинин 221-беренесинин 4-бөлүгүнүн 1-пункту (Коммерциялык же башка уюмдардын кызматчыларынын ыйгарым укуктарын кыянаттык менен пайдалануу) жана 350-беренесинин 1,2,3,5,6 бөлүктөрү (документ жасалмалоо) боюнча кылмыш ишин козгогон. Учурда тергөө иштери уланууда.
