БИШКЕК, 15-июн. — Sputnik. Үстүбүздөгү жылдын 15-октябрына белгиленген президенттик шайлоодо кыргызстандыктар үч түрлүү паспорт менен добуш бере алат. Бул тууралуу Борбордук шайлоо комиссиясынын төрайымы Нуржан Шайлдабекова маалымат жыйында билдирди.
Анын айтымында, жашы жетип, аны менен бирге биометрикалык маалыматын тапшырган бардык кыргызстандыктар шайлоого катышууга мүмкүнчүлүк алат.
"Шайлоочулар биометрикалык, жалпы жарандык паспорт жана ID-кард менен добуш бере алышат", — деди Шайлдабекова.
Эскерте кетсек, Жогорку Кеңеш 14-июнь күнү президенттик шайлоонун 15-октябрда өтө турганын шарттаган токтом кабыл алган. Ал эми 15-июндан тартып бардык каалоочулар өлкө башчылыкка талапкерлигин көрсөтө алат.
