БИШКЕК, 11-июн.— Sputnik. Президент Алмазбек Атамбаев менен жолуккан Бириккен Улуттар Уюмунун Баш катчысы Антониу Гутерриш Кыргыз өкмөтү менен БУУнун ортосунда активдүү кызматташууга көмөктөшөөрүн айтты. Бул туурасында мамлекет башчынын маалымат кызматы кабарлады.
Андан сырткары Кыргызстанда аны таңгалдырып жана баа берген учурларга токтолду.
Жолугушуунун жүрүшүндө Атамбаев БУУнун Баш катчысы Гутерришти жылуу тосуп алды.
"Сизди көргөнүмө абдан кубанычтамын. Биз Астанада да жакшы баарлаштык. Биз үчүн сиздин Кыргызстанга келишиңиз абдан маанилүү", — деди мамлекет башчы.
БУУнун Баш катчысы Атамбаевге жылуу тосуп алганы жана жолугушканы үчүн ыраазычылык билдирди.
Кыргызстандагы иш сапардын алкагында БУУнун баш катчысынын Ош шаарына баруусу каралган.
Гутерриш катуу таасир калтырган экинчи окуя – Оштогу кризис болгонун белгилеген.
"Ошондо мени чындап таң калтырган нерсе – өлкө кризисти демократиялык баалуулуктарга шек келтирбей, коомдун дестабилдешин кайраттуу тосуп алганы. Башка өлкөлөрдө мындай кырдаал демократияны талкалап, көп кырсык алып келиши ыктымал эле. Бирок Кыргызстан көптөгөн кыйынчылыктарды жеңип, демократиялык системаны сактап калды. Менимче бул башка өлкөлөр үчүн чоң сабак боло алат. Бул жагынан алганда мен үчүн бул жерде болуш чоң сыймык, мен мындан ары дагы сиздерге болгон "сүйүүмдү" улантып, Кыргыз өкмөтү менен БУУнун ортосунда активдүү кызматташууга көмөктөшөм", — деди ал.
Ал эми Атамбаев анын Ош шаарына жасай турган сапары туурасында пикирин билдирип, аймакта жакшы жакка өзгөрүү көп болгонун айтты.
"Ош шаарына сапарыңыз дагы ийгиликтүү болот. Жети жыл ичинде кандай өзгөрүүлөр болгонун өз көзүңүз менен көрөсүз", — деди президент.
Маалымат кызматы жолугушуу жылуу маанайда өткөндүгүн кошумчалады.
