Бүгүн өлкө аймагында мезгил-мезгили менен жамгыр жаайт, ал эми өлкөдө күндүн табы 29 градуска көтөрүлөт.
Жамгыр демекчи, кечээ нөшөрдөн улам Аксынын Терек-Суу айылында көчө толо жүргөн сел көптөрдүн үшүн алды…
Кандай бакыт! Чүй облусунда жоголгон үч бала табылды, алар кайда экен дебейсизби? Миңдеген чакырым жол басып, Өзгөнгө кетип калышыптыр… Ата-энелеринин кубанычын элестетип жатам…
Таланттуу адамдарга жакшы эрмек табылды, Кыргызстанда бешик ырларга сынак жарыяланды. Каалагандар эми бөбөктөр үчүн ыр жазса болот.
Ал эми илбирсти камерага тартып эрмектейм деген туристтин жаны көзүнө көрүнгөн шекилдүү… дагы бир кызыгы, аскадан учкан жаныбар, аман-эсеп калыптыр… Укмуштуудай видео, достор!
Жашоо жалган, өлүм ак. Акыркы жылдары Бишкектеги жана анын тегерегиндеги көрүстөндөрдө жер тартыштыгы күч алып, жакыны каза тапкандар аза күтүүнүн ордуна сатып алууга жер издеп келет.
Бул жалганда алдабай, арам иш кылбай жашап өтсө болобу? Кечки тамакка 150 миң төлөндү деген маалымат…
Килемчен мэр… Соцтармактарда Ош шаарынын мэри Аймамат Кадырбаевдин кызыл килем үстүндө туруп сүйлөп жаткан сүрөтү жарыяланып коомчулуктун сынына кабылды.
Чын эле килемге салып ардактай турган кыздарыбыздын бири Айсулуу Тыныбекова дүйнөнүн алдыңкы үч балбанынын катарына кирди.
Кинотасма көрүп алып таасирлегенби, айбандыгы кармаганбы, иши кылып, жаман иш болуптур. Аялдын чачын кырып, бир жума бою зордуктады делген үч киши кармалды.
Сагындым! Сагынган "ким" жана "эмнелер"… анын кайсы бирин айтайын… Бирок бул ажайып жер да ошол сезимди ойготту. Ысык-Көлдүн быйылкы сезондогу жапжаңы сүрөттөрү.
Валюта наркы. Сомдун баасы долларга карата орто эсеп менен 68.20 (сатып алуу) жана 68.45 (сатуу) сомду түздү.
Мунай баасы. Бишкекте орточо эсеп менен алганда Аи-92 үлгүсүндөгү май 38.30 сом, Аи-95 үлгүсүндөгү бензин 41.20 сом, ал эми дизель майы 36.00 сомдон сатылууда.
Соңку сөз. Алтын дат болбойт, жакшы жат болбойт.
Жакшылыктарды каалап, Нургүл Максутова.
