БИШКЕК, 2-июн. — Sputnik. Өкмөттүн Ош облусундагы өкүлү Таалайбек Сарыбашев жер көчкүдөн жабыркаган Өзгөндүн Жалпак-Таш, Аюу, Ничке-Сай айылынын тургундарына гуманитардык жардам алып барды. Бул туурасында облус жетекчилигинин маалымат кызматы кабарлады.
Билдирмеге ылайык, табигый кырсыктан жабыркагандарга макарон, кумшекер, өсүмдүк майы жана чай азыктарынан турган үч тонна гумманитардык жардам жеткирилген.
Эскерте кетсек, Аюу айылында 29-апрелде жер көчүп алты үй-бүлөдөн 24 кишини басып калган. Алты күнгө созулган издөө аракеттеринин натыйжасында көчкү алдынан сегиз адамдын сөөгү чыгарылган. Калган 16 киши ошол жерде калтырылып, айланасы тосулуп, мазар болмокчу. Ага удаа Жалпак-Таш айыл аймагындагы 61 түтүн жашаган айылда сүрүлүп жаткан жер көчкү 10-майга чейин 45 турак жайды басып калган. Кырсык чалган айылдыктар чатырларга көчүп чыккан. Ничке-Сай айылынын Топ-Жаңгак участкасында 26-март күнү таңга жуук жер көчкү жүрүп, төрт балалуу үй-бүлөнү басып калган.
