28-майда Жалал-Абад шаарынын Дача аймагындагы №2115 шайлоо участкасында эки партиянын тарапташтары сөз талашып мушташа кетишкен. Бул тууралуу аймактык кабарчы билдирди.
Жергиликтүүлөрдүн ырастоолорунда аларды ажыратууга аракет кылган киши өзү токмок жеп калып, милицияга кайрылган.
Окуя болгон жерге Жалал-Абад ШИИБдин документтештирүү тобу чыгып, ал жердегилерди ички иштер бөлүмүнө алып келип түшүнүк кат алган.
"Аталган факты Жалал-Абад ШИИБинде каттоого алынды. Арызданган жаранга карата денесиндеги жаратынын оордук даражасын аныктоо максатында сот-медициналык экспертиза дайындалды", — деп айтылат билдирүүдө.
Белгилей кетсек, 28-майда Кыргызстанда 41 жергиликтүү кеңешке шайлоо өткөн. Алардын 21и жергиликтүү кеңешке кезектеги шайлоо болсо, 20сында мөөнөтүнөн мурда шайлоо болду. Алардын арасында Жалал-Абад шаардык кеңешке болгон шайлоо бар.
Буга чейин аталган шаардык кеңеште жергиликтүү өзүн-өзү башкаруу органынын башчыларын шайлай албай, БШКнын сунушу менен президент аларды таркатып, мөөнөтүнөн мурда шайлоо дайындалган.
