БИШКЕК, 6-май — Sputnik. Аюу айылында жер көчкүдөн жабыркагандардын документтерин калыбына келтирүү иштери жүрүп жатат. Бул тууралуу Эмгек жана социалдык өнүгүү министрлигинин маалымат кызматы билдирди.
Кырсык болгон айылда министрдин орун басары Лунара Мамытова эл менен жолугуп жүргөнү кабарланды.
"Табигый кырсыктан дээрлик баарынын документтери жоголгон. Мындан улам азыр башка ведомстволор менен биргеликте жарандардын документтерин калыбына келтирүү иштери жүрүп жатат. Баары такталган соң мыйзамдын негизинде социалдык төлөмдөр берилет", — деп жазылат маалыматта.
Алты күнгө созулган издөө аракеттеринин натыйжасында көчкү алдынан сегиз адамдын сөөгү чыгарылган. Калган 16 киши ошол жерде калтырылып, айланасы тосулуп, мазар болмокчу.
Аюу айылы Өзгөндүн борборунан 30 чакырым алыстыкта жайгашкан. Аталган аймакта 248 үй-бүлө, ал эми киши саны менен алганда 1800гө чукул адам жашачу.
