БИШКЕК, 4-май. — Sputnik. Көчкү алдында калгандар буга чейин "бүгүн түнү көчөбүз" деп тил кат жазып беришкен. Бул тууралуу өзгөчө кырдаалдар министринин орун басары Калыс Ахматов парламентте депутаттардын суроолоруна жооп берип жатып билдирди.
Эскерте кетсек, 29-апрель күнү саат 6:40тарда Ош облусунун Өзгөн районундагы Зергер айыл аймагынын Аюу айылында жер көчүп, 11 турак-жайды 24 адамы менен кошо басып калган.
"Көчкү жүргөн Аюу айылынын тургундарына үч ирет эскертүү айтылган. 2003-жылы эле жер көчөрү айтылып, жер тилке ссудасы менен кошо берилген. Ошол жылы үч эле турак-жай бар эле. Калган үйлөр мыйзамсыз курулган", — деди Ахматов.
Министрдин орун басары көчкү алдында калгандар 27-апрель күнү "бүгүн түнү көчүп кетебиз" деп тил кат жазып бергенин кошумчалады.
Вице-премьер Жеңиш Разаков учурда өлкө боюнча кооптуу жерде жайгашкан 2376 үй-бүлөгө ссуда берилип, жер тилке бөлүнгөнүн кошумчалады.
