БИШКЕК, 4-май. — Sputnik. Билим берүү жана илим министрлигине Өзгөн районундагы Аюу айылындагы жер көчкүдөн жапа чеккендердин балдарына жайкы эс алууну уюштуруу тапшырылды. Бул тууралуу өкмөттүн маалымат кызматы билдирди.
Ага ылайык, вице-премьер Чолпон Султанбекова жер көчкүдөн жабыркагандарга берилип жаткан жардамдар боюнча Эмгек жана социалдык өнүгүү, Саламаттык сактоо, Билим берүү министрликтеринин отчетун укту.
"Билим берүү жана илим министрлигине өзгөчө кырдаалдан жабыркагандардын балдарына жайкы эс алууну, бүтүрүүчүлөрдүн жогорку окуу жайларга тапшыруусуна жардам берүү маселелерин карап чыгуу тапшырылды", — деп айтылат маалыматта.
Учурда Аюу айылында үч дарыгерден турган чакан клиника иштеп жатат. Андан сырткары, дагы беш дарыгерден турган бригада жөнөтүлгөн. Өзгөн шаарындагы райондук оорукана күчөтүлгөн тартипте иштеп, ал жактан Аюу айылынын 15 тургуну дарыланып, тогузу ооруканадан чыкса, алты бейтап барып-келип дарыланууда.
Белгилей кетсек, 29-январда Өзгөн районундагы Аюу айылында жер көчүп, 24 кишини басып калган. Акыркы маалыматтар боюнча сегиз кишинин сөөгү чыгарылып, 16 жаранды издөө иштери токтотулду.
