Бийликти басып алууга аракеттенген оппозициячылар 4 жылдан 20 жылга чейин кесилди

БИШКЕК, 17-апр. — Sputnik. Бишкектин Биринчи Май райондук соту бийликти күч менен басып алууга аракеттенген деп айыпталган оппозициячыларды 4 жылдан 20 жылга чейин эркинен ажыратуу чечимин чыгарганын Жогорку соттун маалымат кызматы кабарлады.

Эскерте кетсек, 2016-жылдын 21-мартында интернетте үн тасма пайда болуп, анда Бириккен элдик кыймылдын үч өкүлү — Кубанычбек Кадыров, (ИИМдин экс-орун басары), Дуулатбек Турдуналиев жана Бектур Асанов (Жалал-Абад облусунун мурдагы башчысы) бийликти күч менен басып алуу, аймактарда башаламандык уюштуруп, каражатты ич ара бөлүштүрүү тууралуу сүйлөшкөн. Мындан кийин үчөө тең УКМКнын убактылуу тергөө абагына алынган.

Кийинчирээк экс-мамкатчы Дастан Сарыгулов жана Эрнест Карыбеков кармалган. Сарыгулов 339-берене ("Кылмышты жаап-жашырганы үчүн") боюнча күнөөлүү деп табылып, шарттуу түрдө 4 жылга кесилди.

Бектур Асанов менен Кубанычбек Кадыров Кылмыш жаза кодексинин "Бийликти басып алууга даярдануу", "Бийлик өкүлүнө карата зомбулук көрсөтүүгө даярдык" беренелеринин негизинде күнөөлүү деп табылган. Алардын ар бири 12 жылга кесилип, күчөтүлгөн тартиптеги абакта жаза өтөмөй болушту.

Эрнест Карыбеков "Мамлекетке кыянаттык жасоо" беренеси боюнча күнөөлүү деп табылып, мүлкүнөн ажыратылып, 18 жылга эркинен ажыратылды. Ал эми 59-беренеге ылайык, бир нече кылмышка барганы үчүн аны 20 жылга эркинен ажыратуу чечими чыкты.

Асанов менен Кадыровго өткөн жылдын 24-мартынан тарта жаза эсептелине баштаса, Карыбековго 26-марттан тарта саналат. Кыргызстандын Кылмыш жаза кодексине ылайык, күчөтүлгөн тартиптеги абактагы бир күн эки күнгө туура келет. Аталган соттун чечимине экинчи тарап 10 күндүн ичинде даттанууга укуктуу.