БИШКЕК, 10-апр. — Sputnik. Коомдук телерадиокорпорациясынын (КТРК) жетекчиси Илим Карыпбеков өзүнүн Facebook баракчасына ыраазычылык видеосун жарыялады.
Эске салсак, 1-мартка караган түнү Карыпбеков Бишкектеги Аалы Токомбаев көчөсү менен Range Rover машинасын айдап келе жатып, жол четинде турган түркүктү сүзгөн. Ооруканага оор абалда жеткирилип, бир ирет жүрөгү токтоп, дарыгерлердин жардамы менен кайра калыбына келтирилген.
"Мен кетирген катамды, жоопкерчиликти мойнума алам. Мындай ката кетирбешим керек болчу. Бирок, бул окуя катталгандан улам башка айдоочуларга айтаарым өзүңөргө ишенген күндө да этият болуп, сак болуңуздар. Анткени сиз бардык жол эрежесин билген учурда да кырсык болом десе ал бат эле экен. Мени өлүмдөн аман сактап калган тез жардам кызматынын өкүлдөрүнө, дарыгерлерге, кан тапшырган адамдарга жана өмүрүмдө мени көрүп тааныбаган, бирок ар тараптан колдоо көрсөткөн элиме терең ыраазымын", — деген Карыпбеков видео кайрылуусунда.
Ошондой эле Карыпбеков өлкө башчы Алмазбек Атамбаевге, президенттин аппаратына жана буга чейин спортко үндөгөн досторуна да рахматын айткан.
Илим Карыпбековдун автокырсыктан кийинки биринчи маегин Sputnik Кыргызстан материалынан окунуздар>>
