БИШКЕК, 29-мар. — Sputnik. Малды идентификациялоонун I этабына 40 миллион сом жумшалып, айрым аймактарда өнөктүк аяктады. Бул тууралуу өкмөттөн кабарлашты.
Ветеринардык жана фитосанитардык коопсуздук боюнча мамлекеттик инспекциянын төрагасы Калысбек Жумакановун айтымында, бодо жана майда малды идентификациялоо иштери үч жылга чейин уланат.
"Идентификация өлкөдөгү мал-жандыкты электрондук базага киргизүү үчүн жүргүзүлүп жатат. I этабы аягына чыгып калды, ал эми II этабы ушул жылдын сентябрь айында башталат. Долбоорду ишке ашырууга өкмөттөн 28 миллион сом насыя алганбыз. Аны 2018-жылдан баштап биркалардан түшкөн каражаттын эсебинен төлөй баштайбыз. Учурда жүргүзүлгөн идентификациядан 7 миллион сом түштү", – деди Жумаканов.
Өлкөдө эпизоотикалык абал туруктуу сакталып, идентификация, вакцинация иштери жолго салынса ата-мекендик 24 компания өз азыктарын Россия жана Казакстанга экпорттой алат.
