БИШКЕК, 27-мар. — Sputnik. Өзгөн районунун Топ-Жаңгак участкасында дагы үч ирет көчкү жүрүп, топурак алдында калгандарды издөө иштери убактылуу токтотулду. Бул туурасында ӨКМдин маалымат кызмматы билдирди.
Эскерте кетсек, 26-мартта таңга жуук Ош облусунун Өзгөн районундагы Ничке-Сай айылынын Топ-Жаңгак участкасында жер көчүп, бир турак-жайды басып, төрт балалуу үй-бүлө көчкү алдында калган.
Белгилей кетсек, кечээ өзгөчө кырдалдар министри Кубатбек Боронов жана өкмөттүн Ош облусундагы өкүлү Таалай Сарыбашев кырсык болгон аймакка барып эл менен жолуккан.
Жер көчкүнүн узундугу болжол менен 800, бийиктиги 4-15 метрди түзөт. Өзгөн районунун борборунан Топ-Жаңгак участкасына чейин 31 чакырымдык жол. Анын акыркы беш чакырымына унаа бара албагандыктан жөө, атчан катташат.
