БИШКЕК, 26-мар. — Sputnik. Өзгөн районунун Зергер айыл аймагында жер көчкү астында калган үй-бүлөнү буга чейин башка жакка көчүрүү боюнча жергиликтүү бийликке эскертүү берилгенин ӨКМден маалымдады.
Эскерте кетсек, 26-мартта таңга жуук Ош облусунун Өзгөн районундагы Ничке-Сай айылынын Топ-Жаңгак участкасында жер көчүп, бир турак-жайды басып, төрт балалуу үй-бүлө көчкү алдында калган.
Алдын ала маалыматтар боюнча көчкү алдында үй ээси 28 жаштагы жубайы, жети, алты, төрт жана бир жаштагы балдары менен калган. Мындан тышкары, үй ээсинин жакын тууганы да мал издеп барып, ошол үйдө түнөп калганы айтылууда.
Көчкү түшкөн тилкеде жалпысынан беш турак жай жайгашкан. Бир үй-бүлө буга чейин коопсуз жайга көчүрүлгөн. Көчкү алдында калган төрт турак жайдын үчөөндө эч ким жашаган эмес.
Кырсык болгон жердин жогору тарабынан саат 14.00дөр чамасында дагы жер көчүп, кооптуу абал жаралгандыктан издөө, куткаруу иш-аракеттери убактылуу токтотулду.
Окуя болгон жерде ӨКМдин ыкчам тобу, 40 куткаруучу, медицина жана инженердик кызматынын өкүлдөрү, милиция жеринде иш алып барууда.
Кырсык болгон аймакка өзгөчө кырдаалдар министри Кубатбек Бороонов жана өкмөттүн Ош облусундагы өкүлү Таалай Сарбашев жөнөп кетти.
