БИШКЕК, 24-мар. — Sputnik. Нарын облусунун Ат-Башы районундагы Ак-Сай кыштоосунда кардан улам чыга албай калган чабандарга ӨКМдин куткаруучулары жетип, ал-абалы менен таанышып жатат. Бул тууралуу Өзгөчө кырдаалдар министрлигинин маалымат кызматы билдирди.
Акыркы маалыматтарга ылайык, Ак-Сай өрөөнүнө кетчү Торугарт — Көк-Кыя — Кында жолунун 115 чакырымы тазаланды. Бирок бороон тазаланган жолго карды кайрадан үйлөп салып жатат.
"22-мартта Өзгөчө кырдаалдар министри Кубатбек Боронов баш болгон тийиштүү жетекчилер абалды жеринен көзөмөлдөө үчүн Нарын облусуна чыгып кетишкен. 23-мартта алар Ак-Сай кыштоосундагы малчылар менен жолугуп, көйгөйлөрүн уккан. Андан сырткары, муктаж болгондорго алгачкы медициналык жардам көрсөтүлгөн", — деп айтылат маалыматта.
Ошондой эле 16 машинага жүктөлгөн тоюттардын 14 машинасы кыштоолорго жетти. Эки унаа бузулуп калгандыктан Торугарт чек ара тозотунда турат. Аны оңдоо иштери жүрүүдө.
Белгилей кетсек, 12-14-мартта жааган кардан улам Ак-Сай өрөөнүнө барчу жол жабылып, кыштоодогу чабандар менен байланыш үзүлгөн. ӨКМ жол тазаланганга чейин Ат-Башы аймагына өзгөчө кырдаал киргизген.
