БИШКЕК, 22-мар. — Sputnik. Кыргызстандык режиссер Актан Арым Кубаттын "Кентавр" тасмасы Европада прокатка чыга баштай турганын бүгүн режиссер маалымат жыйында билдирди.
Режиссердун айтымында, тасма 2016-жылы тартылып, 10-февралда дүйнөлүк премьерасы болгон.
"Фестивалдан сыйлыкка ээ болушубуз биз үчүн абдан күтүүсүз болду. Эми кыргыз эли кандай кабыл алат деп түйшөлүп турабыз. Тасмага кеткен акчанын 10-15 пайызын мамлекет көтөрдү. 70 пайызын чет элдик досторубуз каржылап берди. Кыргызстанда тартылып, Бельгияда монтаждалды. Тасманын музыкасын немис композитору жазды", — деди режиссер.
Фильмдин сценаристи Эрнест Абдыжапаров элге Кентаврдын философиясын жеткирүүгө аракет кылганын белгиледи.
"Биз азыр Батыштын, Советтер Союзунун жана бүгүнкү күндүн таасири менен жашап жатабыз. Бул кырдаалда адам тазаланып, өзүн кабыл алуу, түшүнүүсү зарыл. Тасманы көңүл ачуу үчүн эмес, бүгүнкү күндө өз ордубузду түшүнүү үчүн көрүү керек", — деди Абдыжапаров.
"Кентавр" тасмасынын улуттук премьерасы 31-мартка белгиленген.
