БИШКЕК, 17-мар. — Sputnik. Ош шаарында Иран мамлекети берген 1 миллион доллар грантка заманбап спорт комплекси курулат. Бул тууралуу калаанын мэриясы билдирди.
Маалыматка ылайык, шаар башчысы Айтмамат Кадырбаев 16-мартта Иран ислам республикасынын Кыргызстандагы элчиси Моджтаба Рузбехани менен жолуккан. Алар Ош шаарына курула турчу спорт комплекстин долбоорун талкуулашкан.
Аталган спорт ордосу шаардын "Манас-Ата" кичирайонуна курулат.
"Мэр жана элчиликтен келген делегация курулуш жүрө турган жер менен таанышты. Долбоор боюнча комплекстин ичинде эки кабаттуу административдик имарат, бассейн жана башка бир нече бөлүмдөр болот", — деп айтылат маалыматта.
Калаа башчысы аталган спорт ордосун эки мамлекеттин тыгыз мамилесин чыңдоо максатында "Достук" деп атоону сунуштаган.
Курулуш иштерин Кыргызстанда ушул тармакта иштеп жүргөн Ирандын компаниясы жүргүзүп, быйыл бүткөрүү каралган.
