БИШКЕК, 17-мар. — Sputnik. Нарын облусунун Ат-Башы районунун Ак-Сай өрөөнүндөгү кыштоодо калган малчыларга барчу жол 25-марттан кийин ачылышы мүмкүндүгүн өкмөттүн аталган облустагы өкүлчүлүгү Sputnik Кыргызстан агенттигине билдирди.
Белгилей кетсек, аталган аймакка калың кар жаап, Ат-Башы районуна өзгөчө кырдаал киргизилген.
Учурда Торугарт тарабынан жолду тазалоо иштери башталган. Жол толугу менен ачылганга чейин өзгөчө кырдаал алынбайт.
"Жолду тазалоого убакыт талап кылынууда. Техника жана күйүүчү май бүгүнкү күндө жетиштүү. Облус башчысы тазалоо иштерин жеринде көзөмөлдөп жатат. Негизинен Ак-Сайда 50гө жакын үй-бүлө бар болчу. Январь айында жол жабылып, аны ачкандан кийин болжол менен 15 чактыдай үй-бүлө малын түшүрүп кеткен. Калгандары тоюттарын жеткирип алышкан", — деп айтылат маалыматта.
Азыр Ак-Сайдагы кыштоодо 35-36дай үй-бүлө бар.
