БИШКЕК, 11-мар. — Sputnik. Премьер-министр Сооронбай Жээнбеков тышкы иштер министри Эрлан Абдылдаев жана транспорт министри Жамшитбек Калиловдун катышуусу менен жыйын өткөрүп, Кытайдын аймагында калган кыргызстандык жүк ташуучулардын айланасындагы кырдаалды талкуулады. Бул тууралуу өкмөттүн маалымат кызматы билдирди.
Эскерте кетсек, 10-март күнү Нарында жүк ташуучу унаалардын айдоочулары митингге чыгышкан. Алардын айтымында, кытай тарап кыргызстандык жүк ташуучу унаалардын бортун контейнерге алмаштыруу талабын коюп, чиркегичи бар унаалар өлкө аймагына киргизилбей калган.
Жыйында Жамшитбай Калиловдун айтымында, буга чейин министрликке жүк ташуучулардын өкүлү кайрылып, Синьцзян-Уйгур автономдуу районунун бажы пункттарында Кыргызстандан барган 100дөй машина турганын айтышкан.
Жүк ташуучулар унаа чиркегичтер металл эмес, брезент менен капталгандыктан Кытайга кире албай калышкан. Кытай тараптан алдын ала эскертүү келген эмес. Транспорт министрлигинин катына да жооп келе элек.
Жыйын соңу менен маселени жеринен чечип келүүсү үчүн Кытайга транспорт министринин орун басарын жиберүү чечими кабыл алынып, сапардын жыйынтыгы менен тийиштүү аракеттер көрүлөрү белгиленди.
