НАРЫН, 10-мар. — Sputnik. Кытайдан жүк ташыган айдоочулар Нарын шаарында митингге чыкканын аймактык кабарчы билдирди.
Айдоочулардын айтымында, Кытай тарап кыргызстандык жүк ташуучу унаалардын бортун контейнерге алмаштыруу талабын коюп, чиркегичи бар унаалар киргизилбей калган.
Митингге чыккандар мындай чектөө былтыр августтан тарта киргизилгенин, ал талапты аткарбагандарды учурда киргизбей жатканын айтышты.
Кытайдан Бишкекке, кайта Бишкектен Кытайга жүк ташыган айдоочу Оморбек Кулунчаков Кытай тарап аларга карата кысым кылып, алгач визаларын ачпай, кийин контейнер койгула деген талаптарын койгонун айтты.
"Европага кире турган машиналардын стандарттарын жокко чыгарып, ордуна контейнер койгула деп жатат. Аны жасата турган болсок кайтадан техникалык паспорт алып, мамлекеттик номерди да алмаштыруу керек болот. Андан сырткары лицензия жана патент алуу зарыл. Алардын бардыгы акчага барып такалат. Биз аны жасата албайбыз", — деди ал.
Митингге чыккандардын дагы бирөө Салабек Билалов алар буга чейин Кытай тараптын айрым талаптарын аткарганын айтат.
Билалов ошондой эле, Кытайдын автоунаалары Кыргызстанга эч кандай тоскоолдуксуз эле кирип-чыгып жатканын айтты. Эгерде кытай тарап мындай талабын жокко чыгарбаса Кыргызстанга Кытайдын жүк ташуучуларын киргизбөө керектигин кошумчалады
Өкмөттүн Нарын облусундагы ыйгарым укуктуу өкүлү Аманбай Кайыпов чогулгандар менен жолугуп, көйгөй менен тааныш экенин, азыр бул боюнча Транспорт менен Тышкы иштер министрлиги иштеп жатканын айтты.
"Кечээ айдоочуларга жолуккам. Эртең өкмөт башчыга кирип, түзүлгөн абал тууралуу маалымат берем. Буюрса, көйгөй жакын арада чечилет", — деп ал митингге чыккандарга кайрылды.
Кайыпов чогулгандарды азыр сабыр кылып күтүп турууга үндөп, кийинки жумалар менен маселе оң жагына чечилип калаарына ишендирди.
