БИШКЕК, 9-мар. — Sputnik. Депутат Өмүрбек Текебаевдин баш коргоо чарасын өзгөртүү боюнча аппеляциялык арыз мурдагы Аскер сотунун имаратында каралмай болгондугун Sputnik агенттигинин кабарчысы депутат Асия Сасыкбаевга таянуу менен жеринен билдирди.
Буга чейин арыз шаардык сот тарабынан каралары айтылып, митингчилер Орозбеков көчөсүнө чогулган болчу. Кабарчынын айтымында, депутаттын тарапташтары каршылык акциясын улантуу үчүн Ак үй алдына жөнөштү.
"Депутат Өмүрбек Текебаев мурдагы Аскер сотунун имаратына алып келингенин анын тарапташы Асия Сасыкбаева билдирди", — деди кабарчы.
Эскерте кетсек, Текебаев 26-февраль күнү Венага болгон иш сапарынан кайтып келе жатканда "Манас" аэропортунан кармалган. Биринчи Май райондук соту "Коррупция" беренеси боюнча айыпталып жаткан депутатты 25-апрелге чейин камакка алуу чечимин чыгарган. Учурда Текебаевдин тарапташтары депутатты үй камагына чыгарууну талап кылышууда.
