БИШКЕК, 1-мар. — Sputnik. Коомдук телерадиокорпорациясынын (КТРК) жетекчиси Илим Карыпбековдун операциядан кийинки абалы оор бойдон калып жатканын Саламаттык сактоо министрлигинин өкүлү Елена Баялинова Sputnik Кыргызстан агенттигине билдирди.
Белгилей кетсек, КТРКнын башкы директору Илим Карыпбеков 1-мартка караган түнү Бишкекте жол кырсыгына кабылган. Ал айдап бараткан автоунаа жол жээгиндеги түркүктү барып сүзгөн.
"Учурда бейтаптын өпкөсү дем алуу аппаратына туташтырылды. Дарыгерлердин айтымында, Карыпбековдун абалы оор бойдон калууда. Саламаттык сактоо системасынын бардык күчү Илимдин өмүрүн сактоого жумшалып жатат", — деди Баялинова.
Ал белгилегендей КТРКнын жетекчисине жасалган операция эки саатка созулган. Таңкы саат 05.00дө бейтапты саламаттык сактоо министри Талантбек Батыралиев келип көрүп, кырдаалды жеке көзөмөлүнө алган.
