Өмүрбек Текебаев эки айга камакка алынды

БИШКЕК, 27-фев. — Sputnik. Биринчи Май райондук соту Жогорку Кеңештеги "Ата Мекен" фракциясынын лидери Өмүрбек Текебаевди эки айга камакта калтырды. Бул тууралуу УКМК билдирди. 

Маалыматка караганда, чогултулган материалдардын негизинде Өмүрбек Текебаевге жактоочу Чынара Жакупбекованын катышуусу менен "коррупция" беренеси боюнча айып тагылып, Биринчи Май райондук сотунун чечими менен депутат 25-апрелге чейин УКМКнын убактылуу кармоочу жайында камакта болот. Ошондой эле Дүйшөн Чотоновдун дагы баш коргоо чарасын караган Биринчи Май райондук соту аны да 25-апрелге чейин камакта калтырды.

Депутат Каныбек Иманалиев эртеңден тарта мөөнөтсүз митингдер уланарын айтып, ал Владимир Путиндин Кыргызстанга болчу иш сапарына зыянын тийгизбегендей болорун кошумчалады.

Белгилей кетсек, депутат 26-февралда Венадагы иш сапарынан кайтып келер замат "Манас" аэропортунан кармалып, 48 саатка камакка алынган. Эл өкүлү 2010-жылы убактылуу өкмөттүн төрага орун басары болуп турганда Россиядагы телекоммуникациялык компанияларынын ээси Леонид Маевскийге MegaCom компаниясын алууга жардам берем деп бир миллион доллар алган деп айыпталууда. Башкы прокуратура Кылмыш жаза кодексинин "коррупция" жана "алдамчылык" беренелери боюнча кылмыш ишин козгосо, тергөө иштерин УКМК жүргүзүүдө.

Текебаев кармалгандан бери анын жактоочулары нааразычылык акцияларын өткөрүшүүдө. Базар-Коргондогу тарапташтары да митингге чыгып, жол жабууга аракет кылышкан.