БИШКЕК, 21-фев. — Sputnik. Жалал-Абад облусунда "Канжар-2017" аскердик машыгуулары башталды. Бул тууралуу өлкөнүн Куралдуу Күчтөрүнүн Генералдык штабынан билдиришти.
Маалыматка ылайык, аскердик машыгуулар Жалал-Абад облусундагы №52870 аскердик бөлүгүндө 20-февралдан 5-мартка чейин уланат. Ага кыргызстандык жоокерлер жана Индиядан келген 20 аскер кызматкери катышууда.
Машыгуулар эки өлкөнүн ортосунда аскердик кызматташуусунун алкагында өтүүдө. Анда кыргызстандык жана индиялык жоокерлер тоолуу аймактарда мыйзамсыз кирген куралдуу топторду жок кылуу боюнча машыгууларын өткөрөт.
Андан сырткары, чалгындоо, инженердик жана аскердик-медициналык багыттар боюнча тажрыйба алмашуулар болуп, практикалык сабактар дагы каралган.
