БИШКЕК, 20-фев. — Sputnik. Казакстандын Тышкы иштер министрлиги Алмазбек Атамбаевдин Euronews телеканалына берген билдирүүсү боюнча кыргыз тараптан түшүндүрмө сурап жатканын Sputnik Казакстан агенттиги жазып чыкты.
"Соода-сатык жүргүзүү үчүн кошуналар менен кызматташуу керек. Эгер Евразия экономикалык биримдигине кирбегенибизде жолдор жабылмак. 2010-жылы Казакстан чек арасын 1,5 айга жапканда бизде адам өлүмү дагы болгон", — деп билдирген Атамбаев.
Дүйшөмбү күнү Казакстандын Тышкы иштер министрлиги бул билдирме боюнча өзүнүн позициясын айтты.
"Кыргызстандын президентинин мындай билдирүүсү көңүл бурдурду. Учурда кыргыз тараптан жооп күтүп жатабыз", — деп билдирген Казакстандын ТИМи.
Белгилей кетсек, президент Алмазбек Атамбаев өткөн жумада Европага иш сапары менен барып, анын алкагында Euronews телеканалына интервью берген.
