БИШКЕК, 21-фев. — Sputnik. КР тышкы иштер министринин биринчи орун басары Динара Кемелова коңшу мамлекеттин Тышкы иштер министринин президент Алмазбек Атамбаевдин айткандары боюнча комментарийинен улам Казакстандын Кыргызстандагы элчисин кабыл алды.
Өлкө башчы Атамбаев Бельгияга болгон иш сапары учурунда "Евроньюс" телеканалынын Евразия экономикалык биримдиги боюнча суроосуна жооп берип жатып 2010-жылы Казакстан чек арасын 1,5 айга жапканда адам өлүмү катталганын айткан.
Андан сырткары, чек арадан өтүүгө чектөө коюлган маалда жаш балдардын тобу Чу дарыясын кечип өтүүгө аракет кылганын, чек арадан алып өтүп, бирок медициналык жардам ала албаган үй-бүлөнүн баласы каза болгону тууралуу да кошумчалады. Бир жарым айга созулган чектөө учурунда өнөкөт оорусу барлар өз убагында дары ала албай каза болгон учурлар катталганын баса белгиледи.
"Чек аранын жабылышы жарандардын социалдык-экономикалык абалын начарлатып, Кыргызстанда чыңалууну жараткан. Мындан ары бул маселе боюнча талашып-тартышкандын ордуна кызматташууну улантуу максатында мамлекет башчылары койгон милдеттерди аткарууга көңүл буруу керек", — деди Кемелева.
Андан сырткары, тышкы иштер министринин биринчи орун басары чек арадагы 12 көзөмөл өткөрүү пунктунун төртөө жабык турганын айтып, бул нерсе 2003-жылы 25-декабрдагы мамлекеттик чек арадагы көзөмөл өткөрүү пунктулары боюнча өкмөттөр аралык келишимди бузуу болуп саналарын эскертти.
