ОШ, 14-фев. — Sputnik. Кечээ, 13-февралда саат 16:00 чамаларында нөөмөт бөлүмүнө Дароот-Коргон айылынын күн батыш тарабындагы Чак айылынын жолуна кар көчкү түшүп, эки автоунааны басып калгандыгы жөнүндө маалымат келип түшкөн. Бул тууралуу Ош ОИИБдин басма сөз катчысы Жеңиш Ашырбаев билдирди.
Алынган маалымат боюнча Чоң-Алай РИИБдин кызматкерлери ыкчам түрдө окуя болгон жерге барганда "Нива" жана Daewoo Matiz үлгүсүндөгү автоунаалар ичиндеги жүргүнчүлөрү менен кар көчкүнүн астында калганы аныкталган.
РИИБдин 17 кызматкери Чоң-Алай райондук жол ишканасына таандык эки автоунаанын жардамы менен кар көчкүнү тазалап, сегиз адамдын өмүрүн сактап калышкан.
"Нива" үлгүсүндөгү автоунаанын ичинде алты жана Daewoo Matiz автоунаадасында эки адам болгон. Алар Кара-Тейит, Жекенди, Дароот-Коргон айылынын тургундары", — деп айтылат маалыматта.
Окуя болгон жерде айдоочулар, жүргүнчүлөр эч кандай жараат алышкан эмес. Кар көчкүнүн калыңдыгы болжол менен 5-6 метр, туурасы 50 метрге жетип, 200 метрге түшкөн.
