Бишкекте бүгүн Дача айылындагы учак кырсыгынан каза болгондор эскерилип, алардын элесине багышталып Куран окулду. "Революциянын каармандарына" монументинин алдында өткөн бул иш-чарага маркумдардын жакындары, бийликтин бир катар өкүлдөрү жана шаар тургундары катышты.
Эскерүүгө келгендер набыт кеткендердин сүрөтүнө гүл коюшту.
"Ошол күнү элибиз кырсыктан жабыркагандарга кийим-кече, азык-түлүк чогултуп жана акчалай жардам көрсөтүп жатты. Кыйын күндө кайдыгер карабай жардамга кол сунган мекендештерге ыраазычылык билдирем! Ынтымактуулук — биздин негизги күчүбүз!", — деди иш-чаранын уюштуруучусу Ассоль Молдокматова.
Белгилей кетсек, 2017-жылдын 16-январында эртең менен саат 7.31де Boeing 747 учагы “Манас” аэропортуна жакын жердеги Дача айылына кулаган. Кырсык 39 кишинин өмүрүн алып, 23 үйдү жараксыз абалга келтирген.
