БИШКЕК, 27-янв. — Sputnik. Москванын чок ортосунда автоунаа дарыяга кулап кеткен. Жол кайгуул кызматынын (ЖКК) өкүлү Алексей Коняев сууга секирип унаа менен кошо чөгүп бараткан аялды сактап калган. Бул тууралуу РИА Новости Россиянын ИИМинин өкүлү Ирина Волкко шилтеме берүү менен жазып чыкты.
Окуя бейшемби күнү кечинде Ростовдогу суу жээгиндеги №10 үйдүн жанында болгон. Жол кырсыгынан улам Subaru Forester үлгүсүндөгү унаа дарыяга кулаган.
"Жол кайгуул милициясынын инспектору унаа менен кошо чөгүп бараткан аялды куткаруу үчүн болгон күчүн жумшаган", — деди Волк.
Анын айтымында, ЖКК өкүлдөрү окуя болгон жерге келер замат алардын бирөө ыкчам кызматтарга билдирүү жөнөтүп өзү дароо сууга секирип аялды алып чыккан.
"Инеспектор Коняев көрсөткөн эрдиги үчүн мамлекеттик сыйлыкка көрсөтүлмөкчү", — деди министрликтин өкүлү.
Куткарылган аял ооруканага жеткирилген. Муздак сууга түшүп катуу үшүп калган ЖКК инспекторуна да медициналык жардам көрсөтүлгөн.
