ОШ, 20-янв. — Sputnik. Өзбекстандын вице-премьер министри Адхам Икрамов Оштогу Бабур атындагы мамлекеттик академиялык өзбек музыкалык драма театрына 50 миң доллар бөлүү убадасын берди. Бул тууралуу театрдын жетекчиси Набижон Мамажанов Sputnik Кыргызстан агенттигинин аймактык кабарчысына билдирди.
Анын айтымында, Өзбекстандын Кыргызстандагы элчилигинин өкүлдөрү театрдын муктаждыктары тууралуу кат жиберүү керектигин билдирген.
"Театрдын чатырынын айрым жерлеринен тамчы өтөт. Эскирген отургучтарды алмаштыруу керек. Мына ушул муктаждыктар боюнча элчиликке кат даярдадык", — деди Мамажанов.
Ал белгилегендей, аталган театрдын артисттери Өзбекстанга мындан 17 жыл мурун барып өнөр тартуулап келишкен.
"Театр артисттери Бабур Мирзо тууралуу спектаклди коюуга даярдык көрүп жатышат. Коңшу өлкө декорация, костюм жана башка керектүү нерселер жаатында жардам берерин айтты", — деди Мамажанов.
Мындан тышкары, Өзбекстан артисттерди Наманган, Анжиян, Ахсикент жана Фергана өрөөндөрүнө гастролго чакырышкан.
