БИШКЕК, 20-янв. — Sputnik. Сот-медициналык экспертиза борбору 1987-жылы курулган болсо, ошондон бери анда оңдоо иштери жүргүзүлгөн эмес. Бул тууралуу Жогорку Кеңештин "Жай отуруп баарлашуу" долбоорунун алкагында журналисттер менен жолуккан депутат Альфия Самигуллина билдирди.
Ал Кыргызстанда адамдын ДНКсын аныктаган лабораториялардын жоктугу көйгөй жаратып жатканын белгиледи.
"Соттук-медициналык экспертиза борборундагы көйгөйлөр 2008-жылы Бишкектен Тегеранга бараткан учак кырсыгынан кийин айкын болду. Анда 69 адам көз жумган. ДНК лабораториялардын жоктугунан өлгөндөрдүн өздүгүн аныктоо үчүн маркумдардын сөөгү чет өлкөгө жиберилген, анын баасы өтө кымбат", — деди Самигуллина.
Депутаттын айтымында, ДНК экспертизасы үчүн жабдууларды сатып алуу боюнча өкмөттүн токтому 2012-жылы эле чыккан. Бирок каржынын жоктугунан ушул күнгө чейин жабдуулар алынбай келет.
Эл өкүлү борбордо иштеген кызматкерлердин маянасынын аздыгы дагы чоң маселе экенин белгиледи.
"Патологоанотомдор менен сот-медициналык эксперттердин иштери физикалык жана моралдык жактан аябай оор. Зыяндуулугу үчүн аларга кошумча акы төлөнүшү керек. Бирок биз аларга жумасына эки ирет бир литр сүт гана берүү менен чектелебиз", — деди депутат.
Самигуллина сот-медициналык экспертиза борборунун абалын талкуулоо маселеси социалдык комитеттин күн тартибине киргизилгенин айтып, тиешелүү мамлекеттик органдардын жетекчилери чакырылгандыгын кошумчалады.
