Буга чейин эки кыздын сөөгүн атасы Руслан Белековдун туулган жери Нарын облусунун Жерге-Тал айылына алынып кетерин маалымдалган. Бирок алар үй-бүлөсү менен кеңешип кыздардын сөөгүн Манас айылындагы көрүстөнгө коюуну чечишкен.
"14-январь күнү кайнатам каза болуптур деп Нарындан суук кабар келди. Улуу кызыбыз Мадина "мен да барып келейинчи" деп аябай көңүлдөндү. Ал эми кичүү кызыбыз Адинай же буту тартпай койдубу же өлүм насип кылганбы, айтор, "барбайм" деп эле болбой койду. Кичүү кызыбыздын жанына караан болсун деп экөөнү тең кошунабыздын үйүнө калтырып кеткенбиз", — деди күйүткө буулуккан эне.
"Кыздарымдын сөөгүн жакыныраак эле бул жакка коюуну чечтик. Жок дегенде топурактарын барып кучактап сагынычымды таркатып, бат-бат барып куран окутуп турабыз", — деди кыздардын энеси.
Махбуба Сатыбалдиева төрт кыз төрөгөн. Бирок эки кызы кичинекей кезинде чарчап калып, "бул эки кызымды да шум ажал алды. Бизге буюрбаптыр" деп ал күйүткө чыдабай ыйлап отурду.
