БИШКЕК, 9-янв. — Sputnik. Премьер-министр Сооронбай Жээнбеков кеңешмеде мамлекеттик органдарга бир айлык мөөнөт аралыгында өлкөнүн Баш мыйзамына киргизилген түзөтүүлөргө ылайык келтирүү үчүн тийиштүү мыйзам долбоорлорун иштеп чыгууну тапшырды. Бул тууралуу өкмөттүн маалымат кызматы тараткан билдирмеде айтылат.
Өкмөт башчы Конституцияга киргизилген түзөтүүлөрдүн актуалдуулугун жана маанилүүлүгүн баса белгиледи.
"Кыргызстан үчүн Баш мыйзамга өзгөртүүлөрдү киргизүү абдан маанилүү, ал өлкөнүн мамлекеттик көз карандысыздыгын бекемдөөгө жана парламенттик башкарууга толук түрдө өтүүгө шарт түзөт. Ошондуктан бүгүнкү күндө өкмөттүн алдында өлкөнүн мыйзамдык базасын Конституцияга ылайыкташтыруу боюнча маанилүү тапшырма турат", – деди Жээнбеков.
Буга чейин КСДП фракциясынын депутаты Дастан Бекешев Sputnik Кыргызстан агенттигине депутаттар да мыйзамдарды Конституцияга ылайыкташтыра турганын билдирген.
Эскерте кетсек, 11-декабрь күнү Баш мыйзамга өзгөртүү киргизүү боюнча референдум өтүп, ага жалпы шайлоочулардын 79,6 пайызы же 948 миң адам "макул" деген добушун берген.
