БИШКЕК, 5-янв. — Sputnik. Түркия бийлиги Стамбулдагы клубда теракт уюштурган адамдын байланыштарын аныктап, ал чет өлкөдө жашынып жүрөт деп божомолдоодо. Бул тууралуу РИА Новости өлкөнүн вице-премьери Вейси Кайнакка шилтеме берип кабарлаган.
Кайнактын айтымында, террорчу кол салуу учурунда жалгыз болгону менен ага бирөөлөр тарабынан колдоо көрсөтүлгөн. Атка минер террорчунун улуту уйгур болушу ыктымалдыгын айтты. Түрк бийлиги шектүүнүн жашырынган жерин билүү максатында анын байланыштарын аныктап чыккан.
Эскерте кетсек, буга чейин түрк ЖМКлары террорчулукка шектүү катары кыргызстандык жаран Яхье Машраповдун атын атап, паспортундагы сүрөтүн жарыялап жиберишкен. Бул маалымат тастыкталбаганын КРдин Тышкы иштер министрлиги ырастап, Машрапов терактыга эч кандай тиешеси жок экендигине айныгыс далилдерди келтирген.
Мурда түрк полициясы теракт уюштургандарды кармоо операцияcында Измир шаарынан шектүү катары 40 кишини колго түшүргөн.
