БИШКЕК, 3-янв. — Sputnik. АКШнын жараны Жейк Раак Стамбулдагы түнкү клубда теракт жасалган күнү ошол жерде болгон. Ал өлүмүш болуп койгону үчүн тирүү калганын бир тууганы Майкл экөө NBC10 телеканалына айтып бергенин РИА Новости жазып чыкты.
Күбөнүн бир тууганы Майклдын айтымында, Жейкти өлүмдөн анын мобилдик телефону сактап калган. Себеби чыгарылган ок санга тийгенде негизги артерия жабыркамак. Бирок бактыга жараша, уюлдук аппаратка тийген ок кайып кетип тизесине тийген.
Анткен менен Жейк Раак өлүмүш болуп жатып калганы үчүн “тирүү калдым” деп ишенет.
“Террорчу мени көздөй ок чыгарганда такыр кыймылдаган жокмун. Ага мени карай ок чыгарууга жол бердим. Мындай учурда өзүңдү тынчтандырууга аракет жасаш керек”, — деди күбө.
Рейтер агенттигинин маалыматына ылайык, терактынын жоопкерчилигин “Ислам мамлекети” террордук уюму өз мойнуна алган.
