Президент мыкты даярдыгы үчүн бий жамааттарына ыраазычылыгын билдирди. Ошондой эле балдарды келе жаткан жаңы жылы менен куттуктап, окууларына албан ийгиликтерди каалады.
Өлкө башчысынын өзүнүн айтымында, жаңы жылды утурлай эл алдына чыкканда ар дайым толкунданып, өзүнүн бала кезин эсине түшүрөт.
"Биздин өлкө туруктуу өнүгүү жолуна түштү, анткени биз бардык аракеттерди келечек ээлери болгон балдардын жаркын келечеги үчүн жасайбыз. Ата-эне үчүн баладан артык эч нерсе жок", — деди Атамбаев.
Салтка айланган бул жаңы жылдык салтанатка республиканын ар кайсы аймагынан 8-14 жаштагы 1 100 бала чакырылган. Алардын арасында окуунун мыктылары, ар кандай сынактардын жеңүүчүлөрү жана кызмат учурунда каза болгон укук коргоо органдарынын кызматкерлеринин балдары бар. Ошондой эле ден соолугу жактан мүмкүнчүлүгү чектелген өспүрүмдөр дагы четте калган жок.
