БИШКЕК, 29-дек. — Sputnik. Чүй облусунун Панфилов районунда темир жолдон поезд коюп кеткенин кишинин ким экени аныкталганын ИИМ билдирди.
Маалыматка ылайык, 21-декабрда болжол менен саат 18:35тер чамасында Чалдыбар — Кайыңды станциясынан поезд бир кишини коюп кеткени боюнча маалымат түшкөн. Окуя болгон жерге милиция барып, темир жолдун четинен жашы 30-35тер чамасындагы кишинин сөөгүн табышкан. Аталган факты боюнча тийиштүү экспертиза дайындалган болчу.
Маркумдун ким экенин аныктоо үчүн керектүү аракеттер көрүлүп, окуя болгон жерге жакын жашаган кишилер суракка алынган. Алынган жыйынтык боюнча маркум Панфилов районунун 26 жаштагы тургуну экени аныкталган.
"Окуя болгон жерди иликтеген учурда маркумдун чөнтөгүнөн клей табылган. Машинисттин айтымында, рельсте отурган кишини байкап, ага эскертүү беришкен. Бирок ал эч кандай көңүл бурган эмес. Ошону менен бирге поездди да токтотууга мүмкүнчүлүк жок болчу", — деп айтылат билдирүүдө.
Маркумдун сөөгү туугандарына берилди.
