БИШКЕК, 28-дек. — Sputnik. Өлүм менен өмүр катарлаш жүрөт экен. Узап бара жаткан маймыл жылы кыргыздын адабияты менен маданиятынын өнүгүшүнө салымын кошкон инсандар, коомдук ишмерлер, алардын сырткары четте иштеп жүргөн мигрант кыз-келиндерибиз тобу менен каза болду. Өкүнүчтүү көрүнүш — мигранттык кылып, Россияга бала бакканы кеткен 13 жашар өспүрүмдүн өзү эмес, сөөгү келди. Алардын элесин эскерүү максатында төмөнкү материалды сунуштайбыз.
4-февралда Кыргыз Эл баатыры, Токтогул сыйлыгынын ээси, акын Сооронбай Жусуев 91 жаш курагында каза болду. Улуу Ата Мекендик согуштун ардагери, "Ак шумкар" белгисинин ээси болгон.
9-февралда Кыргызстандын согуш жана ооруктун, куралдуу күчтөрдүн, укук коргоо органдарынын ардагерлер уюмунун төрагасы Тарас Токомбаев дүйнө салды. Ал кыргыздын атактуу акыны Аалы Токомбаевдин уулу болчу.
7-апрелде Екатеринбургда дайынсыз жоголуп кетип, денеси шаардын автобекетинен табылган 13 жаштагы Айганыштын сөөгү кичи мекенине алып келинип, Мырза-Аке айылында жерге берилди.
10-майда журналист, акын жана котормочу Жолдошбек Зарлыкбеков узакка созулган оорудан ооруканадан дүйнөдөн кайтты.
25-майда айыкпас дарттан белгилүү сценарист жана жазуучу Талип Ибраимов көз жумду. Ал акыркы мезгилдери Төлөмүш Океев атындагы "Кыргызфильм" улуттук киностудиянын башкы редакторлугун аркалап келген.
14-июнда айтылуу Кожожаш мергендин Зулайкасынын ролун жараткан таланттуу актриса Гүлнара Кадралиева каза тапты. Актриса 55 жашка чыккан.
1-июлда Кыргыз эл сүрөтчүсү, Сүрөтчүлөр союзунун мүчөсү Турсунбек Койчиев көз жумду. 75 жаштагы художник өмүрүнүн акыркы мезгилдери ооруп жаткан.
3-июлда дзюдо боюнча "Кодокан" спорт клубунун директору Турсун Курбанов 48 жашында каза тапты. Ал спорттун аталган түрү боюнча СССРдин чебери жана тажрыйбалуу машыктыруучу болгон.
16-июлда Кыргыз эл баатыры, Кыргыз эл акыны, Улуу Ата Мекендик согуштун ардагери Сүйүнбай Эралиев 95 жашында дүйнө салды.
21-июлда Кыргыз эл артисти, балетмейстер Берик Алимбаев 79 жашында каза болду. Ал классикалык жана улуттук спектаклдердеги негизги партиялардын баарын аткарган. Алардын катарында "Ак куулар көлү", "Жизель", "Ромео жана Жульетта" жана башкалар бар эле.
24-авустта Кыргызстандын эмгек сиңирген архитектору Аскар Исаев 85 жашында көз жумду. Бул адам Ак үйдүн жана борбордук куранттын долбоорун түзгөн.
25-августта экс-депутат Нурлан Төрөбеков каза болду. Депутат кесиптештери ал акыркы күндөрү ооруп жүргөндүгүн айтышты. Афганистандагы согушка катышып, Кыргызстандагы афганчы жоокерлердин бирикмесин жетектеп келген.
27-августта Москва шаарындагы Алтуфьевск шоссесиндеги №5 имаратында жайгашкан басмакананын кампасында чыккан өрттөн 14 кыргызстандык кыз-келин каза болду. Москвадагы бул тилсиз жоо жалпысынан 17 кишинин өмүрүн алып кетти.
29-августта мурдагы депутат Эркин Алымбеков көз жумду. Ал Жогорку Кеңештин бир нече чакырылышынын депутаты эле.
17-октябрда белгилүү ырчы, обончу, телережиссер Нурлан Тиллебаев каза тапты. КТРКда режиссерлук кесипти аркалап, кыргыз элине гитаранын коштоосундагы ырлары менен таанылган талант көптөн бери төшөк тартып калган.
