БИШКЕК, 23-дек. — Sputnik. 38 жаштагы кишинин кыздарын зордуктады деген факты боюнча тергөө иштери декабрдын соңунда аягына чыгып, иш сотко өткөрүлөт. Ал эми кыздардын энеси алигиче табыла элек, учурда изделип жатат. Бул туурасында Ички иштер министрлигинин билдиришти.
Кыздарын зордуктап келген ата тууралуу төбө чачты тик тургузган маалыматты 22-декабрда Акыйкатчы институтунан кабарлашкан.
Анда кыздардын бири 12, экинчиси жети жашта экендиги айтылган. Бул ишке шектелген 38 жаштагы атасы учурда Бишкектеги №1 убактылуу коргоо жайына киргизилген.
ИИМдин маалымат кызматынын өкүлү Эрнис Осмонбаев учурда тергелип жаткан бул иш декабрдын аягында соңуна чыгарын айтты.
"Бул факты боюнча козголгон тергөө иштери декабрдын аягында соңуна чыгат. Психиатриялык экспертизалар өткөрүлгөн. Кээ бир тергөө иштери калды. Декабрдын аягы менен иш сотко жөнөтүлөт", — деди Осмонбаев.
Буга чейинки маалыматтарда сексуалдык жактан ыдык көргөн кыздардын энеси эмес, чоң энеси жана атасы менен жашап келгендиги айтылган. Алардын энеси боюнча ИИМ жаңы маалыматтарды ачыктады.
Ал эми акыркы маалыматтарда атасы бул ыплас иштерин негизинен мас учурунда жасагандыгы айтылды.
Издөөдөгү эне…
"Үй-бүлө далай ирет урушуп, кайра элдешип жашап жүргөндүгү тергөө иштеринин жүрүшүндө маалым болду. Кыздардын энеси алигиче табыла элек болгондуктан, учурда изделип жатат. Ал 2009-жылдары түрмөгө отуруп чыккандыгы такталды", — деди ИИМ өкүлү.
Буга чейинки малыматтарда кыздардын кичүүсүнүн документи жоктугу айтылган. Бул боюнча окуя болгон Кемин райондук Социалдык жактан өнүгүү башкармалыгынын жетекчиси Эльза Исмаилова балага туулгандыгы тууралуу күбөлүк жасалып берилгендигин билдирди.
Социалдык өнүгүү министрлиги бул балдар боюнча үй-бүлөнү жана балдарды коргоо бөлүмү тарабынан жекече иш-чаралар иштелип чыгып, анын негизинде иш жүрүп жатканын маалымдады.
Ал кыздардын улуусу учурда чоң энеси менен жашап жаткандыгын, мектепте жакшы окуган, ачык жана активдүү экендигин айтты. Психологдор менен сүйлөшкөндө кошумча жардамга муктаж эместиги аныкталгандыгын кошумчалады.
Алынган маалыматтарга караганда, балдардын энеси кичүү кызын атасына 2016-жылдын май айында маршруткага салып жөнөтүп жиберген. Эне-бала ошондон бери жолугуша элек.
Ал эми социалдык коргоо органдарынын кызматкерлерине кыздардын чоң энеси келини алар менен телефон аркылуу сүйлөшүп, кабарлашып турганын айтып берген. Анткен менен азыр аял издөөдө…
