БИШКЕК, 22-дек. — Sputnik. Бул жылы чек арада болгон чыр-чатактар эки эсеге азайды. Бул тууралуу Мамлекеттик чек ара кызматынын башчысы Мирбек Касымкулов билдирди.
Ведомствонун маалымат кызматы билдиргендей, төрага Ош жана Жалал-Абад облустарында жайгашкан бөлүмдөрдү кыдырып чыккан.
Касымкулов бардык чек ара отряддарына, көзөмөл өткөрүү жайларына барып, алардын иши менен таанышты. Ошондой эле кыргыз-өзбек, кыргыз-тажик жана кыргыз-кытай мамлекеттик чек араларынын абалын көрүп чыкты.
"2017-жылы Чек ара кызматынын жетекчилиги жана жеке курамы коррупциялык иштер менен катуу күрөшөт. Буга байланыштуу антикоррупциялык саясатты жүргүзүү боюнча системалык ыкма иштелип чыкты", — деди ал.
Ошондой эле Касымкулов мамлекеттик чек арада кандайдыр бир мүчүлүштүктөр кете турган болсо, Чек ара кызматынын бөлүм башчылары жоопкерчиликке тартыларын белгиледи.
Мындан сырткары, ал мамлекеттик чек арадагы макулдашылбаган аймактардын абалына өзгөчө көңүл бурду.
"Бул жылы кыргыз-өзбек жана кыргыз-тажик чек ара аймактарындагы конфликттерди эки эсеге азайта алдык. (2016-жылы 12 жаңжал, 2015-жылы 22 жаңжал катталган). Мамлекеттик чек арада чыр-чатактарды басаңдатуу үчүн комплекстүү иш-чараларды уланта беребиз", — деди Касымкулов.
